SEJARAH PEMANSANG JAKU IBAN, DIKSIONARI ENGGAU TRANSLASYEN

Nyangka asil tu enda tentu manah sereta nemban dipeda enggau dibacha, arapka kitai sama beserakup enggau meri tuduh penemu dalam pengawa kitai NGEMANSANGKA JAKU IBAN kemaya hari tu..

1.0  Pelasar Jaku

Jaku iya nya sebengkah kereban ti dikena mensia bekomunikasyen enggau pangan diri. Jaku tu ulih berubah nitihka atur pemansang dunya kemaya ari tu. Pia mega, jaku Iban enda tinggal ari pemansang nemu nya ari sukut sepil, penambah leka jaku baru enggau ti bukai. Ari sukut sepil jaku Iban bisi bida mimit ari sistem sepil ti lama enti dibandingka enggau sistem sepil jaku Iban kemaya hari tu. Ba asil pansik tu lagi deka dipejuraikalangkah rapat ti dikena ngemujurka pansik, aspek jalai jaku, banding bida aspek jalai jaku ti bisi ayan ba pansik enggau sekeda tisih penemu senentang standardisasyen jalai jaku Iban.

            Dikena bejalaika pansik tu, dia dua bengkah bup deka dikena iya nya bup Jalai Jako Iban ti dikarang Ott Steinmayer, 1999 enggau bup di ditengkebang Padang Luna enggau Dr. Chameline, 2011 iya nya Sintaksis Jaku Iban. Sebedau bekenangka enggau silik agi senentang pansik, ditu deka dipejuraika mimit senentang dua bengkah bup ti deka ditusut dalam pansik tu.

           

2.0  Pansik

2.1 Langkah Rapat

Langkah rapat ti dikena ba pansik analisis komporatif senentang jalai jaku Iban bepelasarka mayuh bengkah jalai lalu sekeda langkah rapat ti suah agi dikena iya nya langkah rapat deskriptif enggau langkah rapat preskriptif. 

Langkah rapat deskriptif tu betungkapka gaya jaku Iban ti dikena bala kitai bekomunikasyen enggau orang bukai besari-sari. Lalu atur jaku ti dikena enda nitihka standard jaku Iban ti ulih nyadika chunto laban orang ti bejaku ngena langkah rapat tu enda ngemeratka pemetul atur jalai jaku. Kelimpah ari nya, langkah rapat deskriptif enda ninggalka empas ti ulih mai penemu ti baru sereta ngerembaika pikir enggau runding bala kitai Iban. Lalu bepelasarka pemerati aku, bup Jalai Jako Iban ti ditulis Otto Steinmayer ngena langkah rapat tu lebuh ti betuliska bup. Kebuah iya, iya mayuh ngaga pansik senentang bakani nyebut jaku Iban lalu ditranskripka iya ngagai tukuh ti betulis. Chunto ba lambar 51 ba baris 12 ari struktur jaku ti ditulis iya  nya “Pai ‘dah ‘jalai ke p’sar” ti mai reti “Apai udah bejalai ke pasar”.

Langkah rapat ti kedua iya nya langkah rapat preskriptif. Langkah rapat tu bekenangka chara ngena struktur jaku enggau betul ari ti ngembuan atur ti betul sereta tau nyadika malin ti dikena bekomunikasyen enggau engkeman sereta standard. Atur ti bisi baka tu enda ngasuh kitai saru penemu senentang dialek Iban ti bukai lebuh ti betalatka bagi ni siti jaku ti engkeman dikena. Kebuah pia laban jaku kitai Iban mayuh variasyen nitihka pelilih ai. Nya alai, dikena meri jaku Iban nya standard lalu dikena bala mayuh, dia langkah rapat ti amat manah dikena. Bup Sintaksis Jaku Iban ti dikarang Padang anak Luna enggau Dr. Chemaline anak Osup ngena langkah rapat preskriptif. Kebuah pia laban isi sereta turai dalam bup tu endang iya udah dipesetuju bala mayuh endang ulih dikena nyadika malin lebuh ti bejaku.

2.2  Pansik Aspek Jalai Jaku

Jalai jaku iya nya pelasar ti ngadaka sesebengkah jaku ti manah sereta nyamai diperatika orang ti bekenaka jaku nya. Enggau nya, tiap jalai jaku ti dikena patut nemban sereta engkeman dikena. Ulih disimpulka kitai jalai jaku iya nya siti atur ti rama struktur jaku ti nyengkaum bidang morfologi enggau sintaksis. Nitihka penemu Awang Sariyan ba bup Ceritera Bahasa (2002) madahka jalai jaku iya nya atur ti dikena nempa tukuh-tukuh jaku baka leka jaku, frasa enggau ayat ti engkeman. Abdullah Hassan dalam bup Tatabahasa Pedagogi Sekolah Menengah (2008) mega nukuka jalai jaku iya nya sebengkah tusun leka jaku ti nyadi ayat. Chara leka jaku tu ditempa lalu ditusun dalam ayat ti ngembuan reti ti menyana. Nyadi, aspek jalai jaku ti deka dipansik ba bup Sintaksis Jaku Iban enggau Jalai Jako Iban iya nya senentang ayat tanya enggau penyambung.

      Nitihka penemu Dr Chemaline enggau Padang ba bup Sintaksis Jaku Iban madahka ayat iya nya entelian ti pemadu tinggi ba tapis jalai jaku lalu bisi mai reti ti rentang sereta menyana. Ayat tau nyadi ari seleka jaku tauka dijir leka jaku lalu entelian iya nya panyun sereta ditembuka enggau senai lalu ngundan intonasyen ti menyana. Pansik senentang ayat lebih fokus ngagai ayat tanya. Ayat tanya ulih dibagi ngagai dua iya nya ayat tanya nadai  mai jaku tanya enggau ayat tanya mai jaku tanya. Kelimpah ari nya, chara engkah jaku tanya mega deka dipansik. Nangkanka nya, ayat perintah mega deka dipansik. Jaku perintah iya nya jaku ti dikena ngasuh, minta, enggau ngansak (Otto Steinmayer,1999)

      Pansik ti kedua iya nya pansik senentang jaku penyambung ti befungsyen nyambung bayat enggau ayat ti bukai lalu nyadi siti ayat ti besai agi. Mayuh bengkah bansa jaku penyambung baka enggau, sereta, tang, lalu, seraya enggau ti bukai.

2.3  Banding Bida Aspek Jalai Jaku 

Bisi dua bengkah pekara ti deka dipansik. Keterubah iya nya pansik senentang ayat tanya ti bisi ayan ba bup Sintaksis Jaku Iban enggau bup Jalai Jako Iban. Ba bup Sintaksis Jaku Iban di ditulis Dr Chemaline enggau Padang, ayat tanya dibagi seduai iya ngagai dua bengkah iya nya ayat tanya nadai mai jaku tanya enggau ayat tanya mai jaku tanya. Ayat tanya nadai mai jaku tanya iya nya ayat ti suah disebut enggau entak sebut ti tinggi sebedau senai ba ujung ayat. Dalam aktiviti betulis, entak sebut tanya dikelai ngena tanda tanya. Ngambika chunto; “Maria nyabak?”. Ba ayat tu semina ngundan frasa nama enggau frasa pengawa aja lalu nadai ngundan jaku tanya baka nama ba pun ayat. Tajapan ba ayat nya nadai ngundan leka jaku tanya, entak sebut ba patah sebut /bak/ . Ba ditu, orang ti nyebut ayatnya enda nemu Maria ti nyabak.

Lalu ayat tanya tu tau disempulang enggau partikel nih, ti diengkah ba leman ti diambi nyadika fokus ayat. Chunto; “Maria nyabak nih?” Ba ditu, orang ti nyebut ayat tu udah nemu Maria nyabak tang minta sukung orang kedua ti sama nemu pekara nya madah ngagai orang ti ketiga, orang ti enda nemu senentang Maria ti nyabak. Chunto bukai iya nya “Stadium nya besai nih?”. Kelimpah ari nya, leka jaku pia mega suah dikena nentuka pemendar siti-siti pekara ti disebut orang ke ditimbal lebuh berandau. Ngambika chunto; “Orang nya penanyi baru, pia?”. Enti ba bup Jalai Jako Iban ti ditulis Otto Steinmayers, leka jaku nih enggau pia nadai dikena. Pia semina dikena nimbal orang ti bejaku enggau kitai. Ngambika banding, “Iya nurun ke kebun”. “Pia”. Tu nunjukka pemereti orang ti ninga. Tu sisti ari bida ti ayan ba dua bengkah bup tu iya nya, Dr Chemaline enggau Padang ukai semina bekenaka leka jaku pia nunjukka pemereti tang nekanka sesebengkah pekara dalam ayat. Tang Otto Steinmayers mina madah leka jaku pia dikena nyaut nandaka pemereti.

Ayat tanya mai jaku tanya iya nya ayat ti ngundan leka jaku tanya baka nama, sapa, kemaya, berapa, dini enggau ti bukai lalu dikelai enggau tanda tanya ba ujung ayat. Bepelasarka pekara ti udah diperatika ba bup ti ditulis Dr Chemaline enggau Padang semina ngena jaku tanya ba pun ayat tauka belakang ayat. Chunto; “Nama utai nya?” Jaku tanya nama diengkah ba mua. “Manggas deka kini?”.  Jaku tanya kini diengkah ba belakang. Ba bup Otto Steinmayers, jaku tanya ulih diengkah ba mua, belakang tauka diselitka ba ayat. Chunto jaku tanya ti diselitka ba ayat iya nya “Nuan meda sapa tadi ba penngkalan?”. Ulih diperatika kitai jaku tanya sapa diengkah ba belakang jaku pengawa meda. Lalu ayat tu mega ullih nyadi “Sapa dipeda nuan di pengkalan tadi?” tauka “Di pengkalan tadi nuan meda sapa?”.

Kelimpah ari nya, enti diperatika ari bup ti ditulis Dr Chemaline enggau Padang lebih mayuh agi bejuraika senentang guna frasa lalu chara nempa ayat enggau engkeman. Seduai iya magi ngagai beberapa bengkah iya nya frasa nama, frasa adjektif, frasa pengawa enggau frasa jaku penempat. Dikena bejuraika pekara tu, mayuh kar perugan sereta jadual awakka reti ti deka dikenataika diperetika enggau lenak agi. Chunto, “Nembiak nya bebaju burung”. Chara seduai magi iya nya nembiak nya nyadi subjek lalu bebaju burung iya nya predikat. Predikat nya dibagi ngagai dua bengkah iya nya bebaju nyadi jaku pengawa lalu burung nyadika penerang. Ba bup Jalai Jako Iban ti ditulis Otto Steinmayers mayuh bejuraika senentang bekenaka leka jaku dalam komunikasyen besari-sari. Iya enda magi ayat ngagai unit-unit ti mit agi lalu semina nerangka reti sereta chara ngena leka jaku dalam ayat. Ngambika banding, iya lebih bejuraika senentang leka jaku baka enda, nadai, ukai enggau ti bukai.

Kepenudi iya nya pansik senentang penyambung ti dikena ba ayat. Ba bup Sintaksis Jaku Iban, jaku penambah enggau enggau sereta bisi dikena ba siti ayat. Ngambika chunto, “ Gadut enggau Manggas bejaku belubah-lubah sereta betelai”. Ba ayat tu, ayat nya ulih dibagi ngagai empat bengkah ayat pelasar: 1)Gadut bejaku belubah-lubah. 2)Gadut bejaku betelai. 3) Manggas bejaku begadai. 4) Manggas bejakiu betelai. Ba Otto Steinmayers, iya madahka leka jaku sereta nerangka leka jaku nya lebih nekanka  agi senentang sesebengkah pekara. Otto mega madahka leka jaku enggau deka sama enggau reti leka jaku sereta. Otto meri chunto “ Kami nanam jagung sereta(enggau) kacang”.

2.4  Standardisasyen Jaku Iban

Ngerumba pemansang dunya teknologi diatu, jaku Iban nyau majak mayuh ubah awakka standard agi. Jaku ti standard iya nya jaku ti udah ngembuan pengentap sereta ngembuan pengering kediri empu. Jaku ti standard amat beguna laban nya siti ari chara sesebengkah jaku nya tau mansang berindik ari ti ngembuan jaku ke standard. Pengawa ngaga jaku nyadi standard ukai pekara ti mudah tauka senang, iya begunaka sukung, bantu enggau tulung ari bala mayuh. Pengawa begagaka jaku ti standard mega begunaka orang ti landik dalam bidang linguistik ngambika jaku nya engkeman dikena tauka didinga lebuh maya kitai bejaku.

Pekara ti keterubah ti tau diperatika kitai senentang ngangkatka standardisasyen jaku Iban iya nya nyemakaka sistem sepil Iban. Sistem ti sebaka dipeda orang ngayanka serakup ati kitai Iban dalam ngemansangka jaku Iban enggau lebih jauh sereta manah agi. Sistem sepil ti enda sebaka ulih ngenataika penyarut ngagai orang ti betulis kereban dalam jaku Iban laban ti enda nemu sepil ni ti patut dipilih tauka dikena sekalika nya agi ngena sistem sepil dulu suba tauka ngena sistem sepil jaku Iban kemaya hari tu. ngambika chunto, ba sistem sepil Iban  ti baru kediatu mayuh udah nukar urup vokal o ngagai urup vokal u baka ba leka jaku asoh nyadi asuh, maioh nyadi mayuh, jako nyadi jaku enggau ti bukai. kelimpah ari nya, nambahka urup konsonan h nangkan konsonan c. Chunto, ba bup Otto Steinmayers, celap, capan enggau ti bukai. ba bup Dr Chemaline enggau Padang udah ngena sepil baru celap nyadi chelap lalau capan nyadi chapan. Dikena kita nyemakaka semua sistem sepil kitai, dia kitai milih sistem sepil ti baru laban sistem sepil ti baru tu iya nya salah siti ari sistem sepil ke dikena ba sekula. Tu terang nunjukka sistem sepil ti baru tu ngembuan status ke manah bebanding enggau sistem sepil ti lama. Nya alai, bala penulis kemaya hari endang diperansang bekenaka sistem sepil jaku Iban di sekula lebuh ngasilka siti-siti bup, majalah, surat khabar enggau utai bukai laban sistem sepil ti dikena ba sekula nya diasaika ulih nyukung jaku Iban ngagai jaku ti deka begiga sereta bekenaka jaku standard.

Kelimpah ari nya, pengawa ti ulih dikena ngaga jaku Iban nyadi jaku ti standard iya nya nyemakaka entak sebut. Entak sebut tu siti ari pekara ti amat beguna lalu patut dikemeratka lebuh kitai bejaku enggau orang ti enda sama dialek tauka munyi jaku enggau kitai. Penyemaka entak sebut ulih ngasuh kitai mudah tauka nyamai berkomunikasyen enggau pangan diri. Nyema kitai bejaku enggau orang ti enda sama dialek tauka entak sebut enggau kitai, dia iya ulih ngasuh utai ti disebut tauka diterangka orang nya enda entu nyengala diperetika kitai. Nya tadi ulih ngenataika penyarut dalam runding orang ti ninga laban munyi entak sebut nya bisi penyelai. Nya alai munyi entak sebut dalam jaku Iban mega patut disebakaka ngambika iya ulih nyukung jaku Iban nyadi jaku ti standard.

Pekara ti ulih mantu ngaga jaku Iban nyadi jaku ti standard iya nya kitai mesti milih siti jaku aja. Kebuah pia enti nyema kitai bekenaka mayuh bansa jaku dia iya ulih ngenataika penanggul dalam ngaga jaku Iban nyadi jaku ti standard. Pengawa milih siti jaku tu ukai pengawa ti mudah tang iya pengawa ti amat berat dikereja enti nadai kerejasama ari semua kitai Iban. Nyema bisi kerejasama, dia  penanggul tu ulih diputarka enggau lengkas sereta nadai penyarut dikena kitai milih salah siti jaku Iban ti standard.

Nginjau jaku ari bansa bukai mega siti ari chara ti ulih dikena kitai ngaga jaku Iban standard agi sereta nemban dikena. Kebuah pia laban enti nyema dalam jaku Iban bedau bisi ngembuan sesebengkah terminologi endang nadai salah kitai  nginjau ari jaku bansa bukai awakka jaku kita ulih nyadi entap agi kelimpah ulih nyadi jaku intelektual nitihka segang pemansang dunya globalisasyen kemaya hari tu. Nginjau jaku ari bansa bukai mega siti ari chara ti ulih dikena kitai nambahka pengaya jaku dalam jaku Iban. Kitai kelebih agi mayuh nginjau jaku Melayu enggau jaku English lebuh ti deka nempa leka jaku ti baru. Tu salah siti ari penguntung ti diulih kitai lebuh ti bisi nginjau jaku ari jaku bansa bukai. Iya mega siti ari chara ti ulih dikena nyukung tauka mantu jaku Iban awakka ulih sejalai bekenaka jaku enggau sepil Iban ti standard.

3.0  Refleksyen.

Sepemanjai ti bejalaika kereja kus tu, mayuh penanggul sereta penemu baru ti diulih sereta dipelajarka. Aku mega berasai gaga sereta temegah ati laban ulih nembuka kereja kus tu nitihka timpuh ti udah ditetapka. Aku mega meri besai ngagai bala ti udah meri sukung ngagai aku sekumbang ti begagaka kereja kus tu ari ti meri sukung enggau penemu dikena mutarka mayuh macham penanggul ti mai ngagai peneleba ti baru ngagai aku.

Penanggul ti keterubah ditapi aku sekumbang ti bejalaika kereja kus tu iya nya ari saru penemu enggau nama pekara ti patut digaga. Kebuah pia, laban mayuh amat kereja kus ti datai serentak enggau kereja kus tu. Dikena nyeliahka kereja kus tu enda ditembuka nitihka awak ti udah ditaga, dia kau nguji ngiga kereban ti tau dikena aku ngaga kereja kus tu sebedau ngaga kereja kus. Aku mayuh begigaka kereban ari internet enggau bup ti dipinjau ba librari kelimpah ngena bup ti bisi ba aku. Enggau begigaka kereban tu dulu, dia aku bisi draft tauka langkar dikena aku ngaga kereja kus.

Penanggul kedua iya nya, magi jam begagaka kereja kus. Penanggul ba jam tu endang iya penanggul ti suah ditunga lebuh ti begagaka kereja kus. Dikena mutarka penanggul tu, aku nguji meri awak ti lebih ngagai kereja kus bebanding enggau aktiviti luar baka bemain. Aku mega mayuh magi jam berandau enggau bala pangan senentang kereja kus awakka bulih chara bala pangan ngaga sereta mayuh bekunsika penemu.

Penemu baru ti diulih aku lebuh ti begagaka kereja kus tu iya nya, aku nyau nemu agi enggau begulai begagaka kereja kus enggau bala kaban. Kami mayuh bekunsika idea lebuh ti begagaka kereja kus tu kelebih agi enggau Fazlyn seduai Madeevva. Aku mega bisi bekoloborasyen enggau raban ari PISMP Bahasa Iban Sem 3 senentang kereja kus tu.

Aku mega bulih penemu chara mansik bup tang enda entu landik iga. Aku mega nemu bakani penulis bup bejuraika isi penemu sida. Ari tu, aku ulih mandingka pengering enggau pengurang dua bengkah bup enti iya dikena ba jeman diatu. Ba penemu aku, chara Dr Chemaline enggau Padang nemban agi dikena nyadika malin nembiak sekula laban seduai bejuraika enggau lenak agi senentang rambai jaku Iban enti dibanding enggau Otto Steinmayers ti lebih bejuraika chara bekenaka lekaa jaku lebuh bekomunikasyen.

Kelimpah ari nya, aku mega bulih penemu senentang chara ngangkatka jaku Iban nyadi jaku ti standard lalu ulih dikena kitai betalatka leka jaku kelebih agi lebuh ti bejuraika senentang pekara ti intelektual dalam jaku Iban.

4.0  Kereban Sanding

1.    Otto Steinmayers. 1999. Jalai Jako Iban. Kuching. Klasik Publishing House.

2.    Padang Anak Luna & Dr Chemaline Anak Osup. 2011. Sintaksis Jaku Iban. Perak.

Emeritus Publications.

3.    Abdullah Hassan. 2002. Tatabahasa Bahasa Melayu: Morfologi dan Sintaksis untuk

Guru dan Pelajar. Pahang Darul Makmur. PTS Publications  Distributors Sdn. Bhd.

4.    Nik Safiah Karim Etc. Al.. 2004. Tatabahasa Dewan Edisi Baharu. Kuala Lumpur.

Dewan Bahasa Dan Pustaka, Kementerian Pendidikan Malaysia.

5.    Kementerian Pelajaran Malaysia. 2007. Sistem Jaku Iban Di Sekula. Putrajaya.

Perpustakaan Negara Malaysia.

6.    Radiah Yusoff, Nor’aini Ismail & Wan Rose. 2004. Pengantar Linguistik. Kuala

Lumpur. Pearson Malaysia Sdn . Bhd.

MORFOLOGI JAKU IBAN...

Nyangka asil tu enda tentu manah sereta nemban dipeda sereta dibacha, arapka kitai sama beserakup enggau meri tuduh penemu dalam pengawa kitai NGEMANSANGKA JAKU IBAN kemaya hari tu..

1.0  Pun Kenang

Jaku Iban betukuh aglutinatif iya nya betumbuh ari ti meri penambah ngagai urat jaku. Pengerembai jaku Iban bepanggai ba jalai jaku ti nekanka pengelentur enggau penyedang ari segi morfologi. Dikena ngemujurka kereja kus tu, kemayuh agi kereban sanding bepelasarkan bup Morfologi Jaku Iban ti ditulis Dr. Chemaline anak Usop enggau Padang anak Luna. Endang sigi nyamai dikena, diadu, leka jaku Iban ulih ditempa ngena beberapa proses baka meri penambah ngagai urat jaku, beturuka leka jaku enggau betanduka leka jaku.

      Serak tu deka dikenang senentang nempa leka jaku enggau meri penambah ngagai leka jaku. Penambah ulih dibagi ngagai beberapa bengkah baka penambah mua, penambah belakang, penambah kepit enggau penambah selit. Penambah enda ulih bediri kediri aja. Penambah mua iya nya meri penambah pe-, me-, penge-,ny-, be-, di- enggau ti bukai ngagai urat jaku. Penambah belakang iya nya meri penambah ngagai belakang urat jaku lalu dalam jaku Iban semina bisi siti aja penambah belakang iya nya –ka. Penambah kepit iya nya penambah ti ngapit urat jaku. Chunto penambah selit jaku Iban iya nya me..ke, di..ka, be..ka, dike..ka, te..ka enggau ti bukai. Kepenudi iya nya penambah selit. Penambah selit iya nya pengawa ti meri penambah ngagai urat jaku. Chunto beberapa penambah selit iya nya -le-, -er-, enggau -be-.

2.0  Nempa Leka Jaku.

2.1  Jaku Nama

Jaku nama nya seraban leka jaku ti tau nyadi leman teras ngagai pasuk frasa nama lalu jaku ti bansa tu endang dikena meri nama ngagai orang, tempat, bansa utai tauka konsep (Chemaline & Padang, 2011).

Nempa jaku nama enggau meri penambah dalam jaku Iban semina bisi siti aja iya nya meri penambah mua. Penambah mua iya nya meri morfem penambah ngagai urat jaku. Chunto morfem penambah mua ti keterubah iya nya pe-. Guna morfem penambah pe- iya nya dikena nyebut orang ti ngereja pengawa tauka kereban ti dikena mensia ngereja pengawa. Chunto urat jaku iya nya nyapu. Nyapu iya nya jaku pengawa ti madahka orang ti ngereja pengawa meresi ka uras. Dikena nukar jaku pengawa nyapu ngagai jaku nama, dia kitai patut nambah morfem penambah pe- lalu nyadi penyapu. Penyapu iya nya sebengkah kereban ti dikena mensia meresika uras. Chunto ayat ti bekenaka leka jaku nama penyapu, “Indai aku meresika tengah laman kami ti kamah asuh daun kayu nya ngena penyapu sabut”. Chunto kedua iya nya leka jaku nulis. Nulis tu mega sebengkah leka jaku pengawa ti nunjukka pengawa ngukir urup tauka leka jaku. Enti morfem pe- ditambah ba leka jaku nulis, dia leka jaku pengawa nya ditukar nyadi leka jaku nama penulis. Penulis tu mai reti orang ti ngereja pengawa ngukir tauka nulis sereta ngasilka bup. Chunto ayat bekenaka leka jaku nama penulis; “Amat landik penulis bup tu narit ati mensia mayuh enggau jalai jaku ti manah sereta bebungai-bungai”.

Chunto morfem penambah kedua iya nya morfem penambah peny-. Nyau deka sama ngau morfem penambah pe-, morfem peny- mega dikena nukuka orang ti ngereja pengawa tauka objek ti dikena bala mensia. Chunto urat jaku iya nya sepit. Enti ditambah morfem penambah peny-, dia leka jaku sepit deka nyadi penyepit. Ba ditu, urup s tauka pun urup deka dibuai ari leka jaku sepit. Reti leka jaku penyepit iya nya siti perengka dikena nyengkau tauka ngambi sereta ngenanka gari awakka enda labuh. Ngambika chunto, penyepit panggang, penyepit gari, penyepit sintung enggau ti bukai. Chunto dikena ba ayat baka “Diu minta penyepit ari ini iya dikena ngalihka panggang babi sida”. Chunto leka jaku kedua iya nya leka jaku sakal. Sakal iya nya jaku pengawa ti mai reti ulah ti mantah pengawa orang bukai. Sebaka ngau sepit mega, urup ti keterubah ba leka jaku deka dibuai lalu ditambahka enggau morfem penambah peny- ti ngasuh leka jaku nya nyadi penyakal ti mai reti orang ti mantah pengawa orang bukai. Chunto ba ayat iya nya; “ Mayuh amat bala penyakal ba sitak Selangau enti dibandingka ba sitak bukai ba bagi menua Sibu”. Nitihka pansik ti digaga, kemayuh agi urat jaku ti ngena morfem peny- mayuh bepun ati urup ‘s’.

Kelimpah ari nya, penambah belakang mega bisi dikena ba jaku nama. Semina bisi aja morfem penambah belakang iya nya -ka. Chunto leka jaku ti ulih ditambahka enggau morfem belakang -ka iya nya leka jaku idup ti nyadi idupka. Chunto ayat ngena leka jaku idupka; “Uji idupka nuan anak padi bukit tu ketua awakka enda punas ila”. Chunto leka jaku kedua iya nya jaku nama kemudi. Ditambah enggau morfem penambah belakang -ka lalu nyadi kemudika. Chunto ayat; “Kemudika nuan Igat perau tua laban aku deka belelak enda lama”.

Bekenaka morfem penambah amat begunaka pengelandik enggau pemereti siku-siku ba jaku Iban. Enti morfem penambah diengkah sengapa alai, nya ti ngasuh leka jaku nya nyadi jaku ti bukai tauka nadai ngundan reti dalam jaku Iban. Ngambika chunto, enti leka jaku nyapu di tambah enggau morfem me-, dia leka jaku nya lalu nyadi menyapu. Dalam jaku Iban, leka jaku menyapu nadai dikena, tang leka jaku nya semina bisi ba jaku Melayu pia mega leka jaku nulis enti ditambah morfem me- nyadi leka jaku menulis. Pia mega enti leka jauk sepit ditambah enggau morfem penambah mua di- ti ngujungka leka jaku nya nyadi leka jaku pengawa. Ngambika chunto leka jaku sepit nyadi disepit enggau sakal nyadi disakal.

2.2  Jaku pengawa

Jaku pengawa nya leka jaku ti nyadi teras ngagai pasuk tauka konstruk frasa pengawa. Frasa pengawa datai ari jaku pengawa ti tau disempulang mayuh leman jaku baka jaku bantu, objek, penembu, ayat komplemen enggau penerang (Chemaline & Padang,2011). Ba jaku pengawa bisi dua bengkah iya nya jaku pengawa intransitif enggau jaku pengawa transitif.

Nempa jaku pengawa enggau penambah ulih ditempa enggau meri penambah mua, belakang enggau kepit. Penambah mua dikena nempa jaku pengawa baka m-, n-, ng-, ny-, be-, di-, dipe-, en-, em-, eng-, te- enggau me-. Chunto penambah mua jaku pengawa ti keterubah iya nya m-. Ngena morfem penambah mua m-, dia urup pun urat leka jaku deka ditingkilka. Ngambika chunto leka jaku buka ditambahka morfem penambah m- nyadi muka. Reti leka jaku muka iya nya pengawa ti nelenga tauka nukang sesebengkah objek baka pintu. Chunto ayat; “Sunti muka penjan bilik sida awakka angin ulih tama”. Chunto morfem penambah ti kedua iya nya n-. Sebaka enggau penambah mua m-, tiap leka jaku ti ditempa deka ditingkilka urup keterubah. Ngambika chunto, leka jaku tanchang. Enti leka jaku tanchang ditambahka morfem penambah n-, dia leka jaku nya deka nyadi nanchang. Nanchang ngembuan reti pengawa ti nyimpul objek enggau tali, tali enggau ti bukai. Chunto ayat; “Nuni nanchang mua guni nya ngena tekalung awakka padi enda labuh naya”. Nangkanka nya, penambah mua bete-. Morfem penambah mua tu ngembuan reti ti mayuh lalu mai reti besempepai alai, sebarang endur tauka sepeneka ati. Chunto leka jaku iya nya telakak enti ditambah enggau morfem penambah mua bete- nyadi betelakak. Leka jaku tu nyau deka sebaka enggau leka jaku betegaring iya nya orang ti gali telentang. Chunto ayat; “ Bala sida Ambu ngau betelakak sepengudah diinsah lima benda tuak”.

      Penambah ti kedua dikena nempa jaku pengawa iya nya penambah belakang. Dalam jaku Iban, semina sebengkah aja morfem penambah belakang iya nya -ka. Chunto leka jaku ti deka ditambah morfem penambah belakang -ka iya nya angkat ti nyadi angkatka lebuh ti udah ditambah enggau penambah. Chunto ayat; “Asuh angkatka Buni guni sum nya ngagai bilik lagi”. Bepelasarka pansik ti udah digaga, kemayuh agi leka jaku ti ditambah enggau morfem penambah belakang -ka dikena ba dialog tauka randau mensia mayuh.

      Penambah ti ketiga ba jaku pengawa iya nya penambah kepit. Penambah kepit  nya leman ti diken ngepit urat jaku. Penambah kepit mega tau disebut penambah betangkup ti alai bisi penambah mua enggau belakan nangkup urat jaku. Semua penambah belakang ti dikena ba penambah kepit iya nya –ka ti nunjukka konsep ngasuh tauka nuduhka orang ngereja sesebengkah pengawa. Chunto penambah ti dikena ba penambah kepit jaku pengawa iya nya me-...-ka, nge-...-ka, nye-...-ka, peR-...-ka, dipeR-...-ka, beR-...-ka, teR-...-ka, di-...-ka, dike-...-ka, n-...-ka,enggau m-...-ka. Chunto leka jaku iya nya sayau. Leka jaku sayau ulih dikepit enggau mayuh morfem penambah baka dikesayauka, dipesayauka, enggau disayauka. Chunto ayat; “Anne endang amat dikesayauka Harun”. Chunto leka jaku ti kedua iya nya ungkup. Leka jaku ungkup tau ditambah enggau beberapa morfem penambah baka ngungkupka enggau diungkupka. Chunto ayat; “Anang enda ingat ngungkupka Indai Jinap tunu babi nya nuan lagi Junak” enggau “Indai Jinap diungkupka sida Junak sechapan tunu babi”.

2.3  Jaku Adjektif

Jaku adjektif iya nya .

Ba jaku adjektif ulih ngena penambah mua, belakang, kepit enggau selit. Penambah mua ti nempa jaku adjektif nya nge-, be- enggau beke-. Chunto morfem penambah keterubah iya nya nge- ti befungsyen nyadi penerang dikena mandingka tauka madahka gaya pengabis tauka pemadu. Ngambika chunto leka jaku tinggi ditambah morfem penambah mua nge- ngaydi ngeninggi. Chunto ayat; “Enti kitai udah pandai, anang mih kitai ngeninggi diri awakka kitai nyamai begulai enggau orang bukai”. Leka jaku ti bukai bisi penambah mua nge- baka ngemajik, ngengasar, ngemesai enggau ti bukai.

Penambah kepit dalam jaku Iban semina siti aja iya nya nge-...-ka. Chunto leka jaku ti ulih ditambah enggau morfem penambah kepit jaku adjektif iya nya manah. Leka jaku tu deka nyadi ngemanahka enti udah ditambah morfem penambah ti ngembuan reti belakun badas enti bepelasarka chunto ayat tu; “Entiang tak ngemanahka diri sekumbang bala entua iya ke datai enggaika dipeda orang jai”. Chunto ti kedua iya nya, ribai ti nyadi ngeribaika enti udah ditambah morfem penambah. Reti ngeribaika diri iya nya ngumbaka diri baka orang ribai tauka orang putih enti bepelasarka chunto ayat tu; “Nuing ngau ngeribaika diri ari gaya jaku lebuh ti betemu enggau indu dara laban ti enggai enda ditemu orang bepelajar”. Bepelasarka ayat ti udah digaga sereta diperatika, penambah kepit nge-...-ka tu nunjukka orang tauka jelu ti ngumbaka diri nyadi orang bukai enda nipakka ulah asal sida.

Kepenudi bendar penambah bagi jaku adjektif iya nya penambah selit. Penambah selit amat mimit dalam jaku Iban lalu suah dikena ba lebas ti ditentuka aja. Dalam jaku adjektif, morfem penambah selit iya nya -be-. Chunto leka jaku adjektif ti ulih ditambah enggau morfem penambah -be- iya terunsai nyadi teberunsai. Tajapan bisi ditambah enggau morfem penambah, reti dua leka jaku nya enda berubah. Chunto ayat; “Gamal Kadom nyau terunsai laban ti udah dibintis indu manuk” enggau “Gamal Kadom nyu teberunsai laban ti udah dibintis indu manuk”. Chunto leka jaku ti kedua nya nya teringkas enggau teberingkas. Reti leka jaku tu iya nya labuh ari palan asal bepelasarka chunto ayat tu; “Ribih uyut Tagai nyau teringkas ari bau” enggau “Ribih uyut Tagai nyau teberingkas ari bau”. Chunto bukai leka jaku ti bisi ngena morfem penambah -be- baka teleka nyadi tebeleka, kelechut nyadi tebelechut, terayan nyadi teberayan. Guna morfem penambah -be- bepelasarka beberapa chunto ti digaga ba ayat iya nya dikena nukuka biuh ulah ti enda sengaja ti digaga mensia.

           

2.4  Jaku Tugas.

Nitihka Nik Safiah Karim enggau bala iya ti bukai, 2008 jaku tugas ulih dibagi ngagai empat gempung besai iya nya jaku penyambung ayat, jaku praklausa, jaku prafrasa enggau jaku pasca jaku. Penambah jaku tau disidi kitai enggau beratika tiap bagi jaku ti udah dibagi nya tadi.

Ba jaku penyambung ayat, penambah ulih dipeda kitai ba jaku penyambung selit penerang ti befunsyen nyambung klausa ti nyadi penerang ngagai batang klausa. Ngambika chunto, penambah belakang -ka ba jaku datai. Chunto ba ayat iya nya “Amat bendar Jang belawa dataika iya nyau sengah-sengah laban ti lari digagai ukui”. Ba ditu kitai ulih meda leka jaku dataika nerangka batang klausa senentang Jang.

Ba jaku praklausa, kitai tau meda ngagai jaku pun ayat ti nyadi penanda kena ngelai penampung ayat dalam genteran. Ngambika banding, penambah be- ti dikena ba beduduk, berindik, enggau beserimbai. Chunto dalam genteran “Kemari bisi dapur angus ba bilik sanu. Beduduk/berindik ari nya, kitai serumah mesti bejimat lebuh ti berapi ba dapur”. Jaku pun ayat ti dikena ba genteran tu iya nya berindik ari nya tauka beduduk ari nya.

Ba jaku prafrasa, enda tentu mayuh penambah ulih diperatika. Taja pia, kitai ulih bekenaka penambah selit ba sekeda leka jaku penempat baka leka jaku sentang ti nerangka reti sesebengkah perkara ti enda nyemetak tauka pekara rama ti enda bebatang tau titambah enggau penambah selit -en ti ngasuh leka jaku sentang nyadi senentang tang agi ngembuan reti ti sama. Chunto dalam ayat “Senentang pekara tu, kami ngasaika patut bendar iya dibai ngagai pegawai ti tinggi agi ngambika ulih mutarka iya”.

3.0  Simpul Penemu

Nyadika simpul kenang, jaku Iban edang betukuh aglutinatif iya nya betumbuh ari ti meri penamba ngagai urat jaku. Meri penambah ngagai urat jaku endang beguna bendar awakka leka jaku ngembuan reti ti menyana sereta ulih dtai ba orang ti macha sereta ninga leka jaku ti ditulis tauka dipansutka. Dalam jaku Iban baka jaku bukai mega ngembuan jaku nama, jaku pengawa, jaku adjektif enggau jaku tugas ti ngembuan tukuh kediri empu.

      Dalam sub jaku nya ngembuan mayuh chara nempa leka jaku baka meri penambah, nuru, nandu, bekaling sebut enggau puntang. Siti ari chara nempa leka jaku ti dikenang ba kereja kus tu iya nya ngena jalai ti meri penambah ngagai urat jaku. Chara meri penambah ulih dibagi ngagai empat chara iya nya meri penambah ngagai mua, belakang, kepit enggau selit.

      Tiap-tiap penambah ngembuan guna kediri empu sereta chara ngena iya. Ngena morfem penambah enggau salah ulih ngasuh reti urat jaku enda datai sereta nadai ngembuan reti.

4.0 Refleksyen.

Sepemanjai ti bejalaika kereja kus tu, mayuh penanggul sereta penemu baru ti diulih sereta dipelajarka. Aku mega berasai gaga sereta temegah ati laban ulih nembuka kereja kus tu nitihka timpuh ti udah ditetapka. Aku mega meri besai ngagai bala ti udah meri sukung ngagai aku sekumbang ti begagaka kereja kus tu ari ti meri sukung enggau penemu dikena mutarka mayuh macham penanggul ti mai ngagai peneleba ti baru ngagai aku.

Penanggul ti keterubah ditapi aku sekumbang ti bejalaika kereja kus tu iya nya ari saru penemu enggau nama pekara ti patut digaga. Kebuah pia, laban mayuh amat kereja kus ti datai serentak enggau kereja kus tu. Dikena nyeliahka kereja kus tu enda ditembuka nitihka awak ti udah ditaga, dia kau nguji ngiga kereban ti tau dikena aku ngaga kereja kus tu sebedau ngaga kereja kus. Aku mayuh begigaka kereban ari internet enggau bup ti dipinjau ba librari kelimpah ngena bup ti bisi ba aku. Enggau begigaka kereban tu dulu, dia aku bisi draft tauka langkar dikena aku ngaga kereja kus.

Penanggul kedua iya nya, magi jam begagaka kereja kus. Penanggul ba jam tu endang iya penanggul ti suah ditunga lebuh ti begagaka kereja kus. Dikena mutarka penanggul tu, aku nguji meri awak ti lebih ngagai kereja kus bebanding enggau aktiviti luar baka bemain. Aku mega mayuh magi jam berandau enggau bala pangan senentang kereja kus awakka bulih chara bala pangan ngaga sereta mayuh bekunsika penemu.

Penemu baru ti diulih aku lebuh ti begagaka kereja kus tu iya nya, aku nyau nemu agi enggau dalam chara sereta guna penambah baka penambah mua, belakang, apit enggau selit dalam jaku Iban. Aku rindu agi ninga sereta mansik senentang penambah selit laban munyi leka jaku ti ditambah enggau morfem penambah selit ngembuan munyi ti manah didinga. Tiap-tiap iti penambah mega ngembuan guna kediri empu lalu begunaka penemu ti dalam awakka penambah nya dikena enggau betul lalu negmbuan rei ti menyana.

Kelimpah ari nya, aku mega belajarka chara magi sub-sub topik enggau betul awakka enda nyelui ari leka jaku ti udah ditaga. Kebuah pia laban tiap subtopik mesti ngembuan isi ti engkeman sereta betul.

4.0  Sanding Penemu

1.    Abdullah Hassan. 2006. Morfologi: Siri Pengajaran Dan Pembelajaran Bahasa

Melayu. Kuala Lumpur. PTS Profesional Publishing Sdn. Bhd.

2.    Dr. Chemaline anak Usop & Padang anak Luna. 2011. Morfologi Jaku Iban. Tanjong

Malim. Emeritus Publications.

3.    Kementerian Pelajaran Malaysia. 2007. Sistem Jaku Iban Di Sekula. Putrajaya.

Perpustakaan Negara Malaysia.

4.    Nik Safiah Karim et al.. 2004. Tatabahasa Dewan Edisi Baharu. Kuala Lumpur.

Dewan Bahasa dan Pustaka.

5.    Dato Sri Edmund Langgu Anak Saga. 2011. Bup Sereba Reti Jaku Iban. Kuching.

Tun Jugah Foundation.