Pelandai sinu ti ngenang penusah ti nuntung kami serumah ba Rumah Lichai Sg Tepus Ulu Balingian kena 18/2/2014 urung jam 9:30 pagi..
diayu nadai guna,
dikenang nadai mih daya,
semina beserah aja ngagai Petara laban semina Iya ti nentu ke semua.
nadai agi beterauh sada nyawa,
nadai didinga agi jegit sida ketawa,
semina besampi dalam ati enda didinga,
ngarapka semua tau mujur ke dudi ari ila.
nadai agi aku meratika nuan,
nadai agi aku begulai enggau nuan,
nuan nadai agi,
udah midang lesi bebadi,
nuan udah lenyau enda ulih ku tengau,
baka abu ti terebai nyadi debu.
sinu ati ngenang,
kelai tua begulai enggau orang bukai,
sinu ati meda,
nuan rebah ke tanah baka ke seredah,
baka manuk alah pantuk,
baka babi lepi tejelepi,
baka abi mayau semina tinggal bekau.
ati ti kering nyau tebimbing,
ati ti liat ringat nyau tachat,
ai mata ti langkang
nyau runtuh enda ulih diempang.
nuan ti ngajar reti pengerindu,
awakka enda nemu leju,
nadai agi alai aku telempai tepanggai,
begulai bejalai ngerayap sereta bepegai,
nadai agai rami diatu nyau sunyi.
alai mih nuan sulu pergi,
enda aku ngenang nuan agi,
anang nuan nyerungkai pengingat lama,
awakka iya terebai enda agi tepanggai,
awakka iya nyemerai enda agi sangkai,
telempai mih tua ambai,
nangka tu aja bungai ti di jaga ngerembai,
awakka layu lenyau sulai.
No comments:
Post a Comment